aalam mein hare honge ashjar jo main roya

aalam meñ hare hoñge ashjār jo maiñ royā

gulchīñ nahīñ sīñcheñge gulzār jo maiñ royā

barsegā jo abr aa kar khul jā.egā dam bhar meñ

aañsū nahīñ thamne ke ai yaar jo maiñ royā

ro.o.ge jharoke meñ tum hichkiyāñ le le kar

ai yaar kabhī zer-e-dīvār jo maiñ royā

zaḳhmī huuñ to hone do kyuuñ yaar bisorūñ maiñ

kyā baat rahī khā kar talvār jo maiñ royā

huuñ musta.id-e-riqqat farhād mujhe bahlā

le Dūbeñge tujh ko bhī kohsār jo maiñ royā

majnūñ ne kahā jaao vahshat unheñ dikhlāo

baiThā huā sahrā meñ be-kār jo maiñ royā

rahm aa hī gayā un ko kaTvā de mirī beḌī

zindān meñ chillā kar ik baar jo maiñ royā

kī ġhusse ke maare phir us ne na nigah sīdhī

in añkhḌiyoñ kā ho kar bīmār jo maiñ royā

betābī o zaarī par merī unheñ rahm aayā

dikhlā hī diyā mujh ko dīdār jo maiñ royā

ārām vo karte haiñ rulvā na mujhe ai dil

Thahreñge na vo ho kar bedār jo maiñ royā

aa.e the ba-mushkil vo laa.e the 'sharaf' un ko

phir uTh ga.e vo ho kar bedār jo maiñ royā

aalam mein hare honge ashjar jo main roya

gulchin nahin sinchenge gulzar jo main roya

barsega jo abr aa kar khul jaega dam bhar mein

aansu nahin thamne ke ai yar jo main roya

rooge jharoke mein tum hichkiyan le le kar

ai yar kabhi zer-e-diwar jo main roya

zaKHmi hun to hone do kyun yar bisorun main

kya baat rahi kha kar talwar jo main roya

hun mustaid-e-riqqat farhad mujhe bahla

le Dubenge tujh ko bhi kohsar jo main roya

majnun ne kaha jao wahshat unhen dikhlao

baiTha hua sahra mein be-kar jo main roya

rahm aa hi gaya un ko kaTwa de meri beDi

zindan mein chilla kar ek bar jo main roya

ki ghusse ke mare phir us ne na nigah sidhi

in ankhDiyon ka ho kar bimar jo main roya

betabi o zari par meri unhen rahm aaya

dikhla hi diya mujh ko didar jo main roya

aaram wo karte hain rulwa na mujhe ai dil

Thahrenge na wo ho kar bedar jo main roya

aae the ba-mushkil wo lae the 'sharaf' un ko

phir uTh gae wo ho kar bedar jo main roya