آنا نہ سامنے کہیں اس سامنے کے بعد

آنا نہ سامنے کہیں اس سامنے کے بعد

ترجیح تم مجھی کو نہ دو آئنے کے بعد

آنکھوں کو اپنی بند نہ کر لوں تو کیا کروں

اب دیکھنا ہی کیا ہے تجھے دیکھنے کے بعد

دل توڑنا تو سہل ہے لیکن یہ سوچ لو

جوڑا نہ جا سکے گا یہ دل توڑنے کے بعد

ہم جیسی داد حسن نہ دے گا یہ آئنہ

آخر ہمیں کو دیکھو گے تم آئنے کے بعد

محسوس یہ ہوا کہ جو مانگا تھا مل گیا

تجھ پر نظر پڑی جو دعا مانگنے کے بعد

دل ٹکڑے ٹکڑے ہو کے بھی کہلا رہا ہے دل

آئینہ آئنہ نہ رہا ٹوٹنے کے بعد

بوجھل تمام جسم ہے شل دست و پا وقارؔ

منزل ملی تو کیا ملی تھک ہارنے کے بعد