aandhi chali to gard se har chiz aT gai

āñdhī chalī to gard se har chiiz aT ga.ī

dīvār se lagī tirī tasvīr phaT ga.ī

lamhoñ kī tez dauḌ meñ maiñ bhī sharīk thā

maiñ thak ke ruk gayā to mirī umr ghaT ga.ī

is zindagī kī jañg meñ har ik mahāz par

mere muqāble meñ mirī zaat DaT ga.ī

sūraj kī barchhiyoñ se mirā jism chhid gayā

zaḳhmoñ kī sūliyoñ pe mirī raat kaT ga.ī

ehsās kī kiran se lahū garm ho gayā

sochoñ ke dā.eroñ meñ tirī yaad baT ga.ī

aandhi chali to gard se har chiz aT gai

diwar se lagi teri taswir phaT gai

lamhon ki tez dauD mein main bhi sharik tha

main thak ke ruk gaya to meri umr ghaT gai

is zindagi ki jang mein har ek mahaz par

mere muqable mein meri zat DaT gai

suraj ki barchhiyon se mera jism chhid gaya

zaKHmon ki suliyon pe meri raat kaT gai

ehsas ki kiran se lahu garm ho gaya

sochon ke daeron mein teri yaad baT gai