آندھیاں اٹھتی ہیں تہذیب کے ویرانوں میں

آندھیاں اٹھتی ہیں تہذیب کے ویرانوں میں

جھوٹے کردار ہیں سچائی کے افسانوں میں

آنکھ جو دیکھتی ہے کہنا بڑا مشکل ہے

شور ہی شور ہے حرفوں کے نگہبانوں میں

کیا عیادت کیا عقیدت کیا ہے سجدہ ریزی

بس خدا نام کا ہے آج کے انسانوں میں

موت آساں نہیں اس کار گہہ ہستی میں

ہم کو امرت ملا زہراب کے پیمانوں میں

روشنی سے تو ہی زندہ نہیں ہر شخص یہاں

وہ بھی ہیں لوگ جو زندہ ہیں سیہ خانوں میں

ہم تو راہیؔ کبھی مندر کبھی مسجد بھی گئے

دل کو تسکیں ملی ویران صنم خانوں میں