aandhiyon ke sath kya manzar suhane aae hain

āñdhiy.oñ ke saath kyā manzar suhāne aa.e haiñ

aaj maidānoñ meñ bāġhoñ ke ḳhazāne aa.e haiñ

ab mire talvoñ ke nīche kī zamīñ āzād hai

āsmānoñ se mujhe bādal bulāne aa.e haiñ

ret se dariyā aTe haiñ ḳhaak se jhīleñ paTīñ

ye parinde ḳhuun meñ shāyad nahāne aa.e haiñ

ḳhvāb jis dil meñ rahā karte the kab kā mar chukā

kis kā darvāza ye bachche khaTkhaTāne aa.e haiñ

in meñ raushan haiñ abhī tak tere bosoñ ke charāg

is liye ham apnī āñkheñ ḳhud bichhāne aa.e haiñ

girtī dīvāroñ se lag kar dīmakoñ ke qāfile

kuchh sahīfe apnī āñkhoñ se lagāne aa.e haiñ

aaj ham sab ek behtar zindagī kī dauḌ meñ

kaise kaise ḳhvāb qabroñ meñ sulāne aa.e haiñ

bārhā is ghar kā baTvārā huā hai aur sadā

apne hisse meñ faqat dukh ke ḳhazāne aa.e haiñ

chaar dushman aa mile haiñ raat kī chhat ke tale

muddatoñ ke baad phir agle zamāne aa.e haiñ

aandhiyon ke sath kya manzar suhane aae hain

aaj maidanon mein baghon ke KHazane aae hain

ab mere talwon ke niche ki zamin aazad hai

aasmanon se mujhe baadal bulane aae hain

ret se dariya aTe hain KHak se jhilen paTin

ye parinde KHun mein shayad nahane aae hain

KHwab jis dil mein raha karte the kab ka mar chuka

kis ka darwaza ye bachche khaTkhaTane aae hain

in mein raushan hain abhi tak tere boson ke charag

is liye hum apni aankhen KHud bichhane aae hain

girti diwaron se lag kar dimakon ke qafile

kuchh sahife apni aankhon se lagane aae hain

aaj hum sab ek behtar zindagi ki dauD mein

kaise kaise KHwab qabron mein sulane aae hain

barha is ghar ka baTwara hua hai aur sada

apne hisse mein faqat dukh ke KHazane aae hain

chaar dushman aa mile hain raat ki chhat ke tale

muddaton ke baad phir agle zamane aae hain