aankh KHamosh nazar Khaali hai

aañkh ḳhāmosh nazar ḳhālī hai

dard kī rāh-guzar ḳhālī hai

raushnī samt badalne ko hai

arsa-e-shams-o-qamar ḳhālī hai

haañ mulāqāt kī saa.at hai yahī

vaqt kā pichhlā pahar ḳhālī hai

aarzū dil meñ nahīñ hai koī

ek muddat se ye ghar ḳhālī hai

uThte jaate haiñ ḳharīdār-e-junūñ

kīsa-e-sher o asar ḳhālī hai

ab kisī dil meñ nahīñ shauq-e-safar

jāda-e-shahr-e-hunar ḳhālī hai

din guzartā nazar aatā hī nahīñ

rang-e-imkāñ se sahar ḳhālī hai

sirf dil hī nahīñ sunsān 'ziyā'

ravish-e-jāñ bhī idhar ḳhālī hai

aankh KHamosh nazar KHali hai

dard ki rah-guzar KHali hai

raushni samt badalne ko hai

arsa-e-shams-o-qamar KHali hai

han mulaqat ki saat hai yahi

waqt ka pichhla pahar KHali hai

aarzu dil mein nahin hai koi

ek muddat se ye ghar KHali hai

uThte jate hain KHaridar-e-junun

kisa-e-sher o asar KHali hai

ab kisi dil mein nahin shauq-e-safar

jada-e-shahr-e-hunar KHali hai

din guzarta nazar aata hi nahin

rang-e-imkan se sahar KHali hai

sirf dil hi nahin sunsan 'ziya'

rawish-e-jaan bhi idhar KHali hai