aankhen bujhi-bujhi si dil-e-laKHt-laKHt dekh

āñkheñ bujhī-bujhī sī dil-e-laḳht-laḳht dekh

ḳhvāboñ ne mere khaa.ī kahāñ par shikast dekh

kuchh der baiTh apnī sunā merā haal pūchh

yuuñ bār-bār apnī ghaḌī meñ na vaqt dekh

sūraj lahū kī jhiil meñ phir ġharq ho gayā

phir aa.ī shaam mere liye ḳhūñ-ba-dast dekh

ḳhvāboñ ke barf-zār meñ tujh ko milegā kyā

sar phoḌnā hī hai to koī sang-e-saḳht dekh

phir gāgaroñ kī thaap pe uḌne lage haiñ giit

jhūloñ se haiñ saje hue saare daraḳht dekh

dushman kī bad-kalāmī pe kyoñ barhamī bhalā

laḌte samay thā terā bhī lahja karaḳht dekh

haiñ merī ḳhvāhishāt talabgār jism kī

tū hai mujassama to koī but-parast dekh

aankhen bujhi-bujhi si dil-e-laKHt-laKHt dekh

KHwabon ne mere khai kahan par shikast dekh

kuchh der baiTh apni suna mera haal puchh

yun bar-bar apni ghaDi mein na waqt dekh

suraj lahu ki jhil mein phir gharq ho gaya

phir aai sham mere liye KHun-ba-dast dekh

KHwabon ke barf-zar mein tujh ko milega kya

sar phoDna hi hai to koi sang-e-saKHt dekh

phir gagaron ki thap pe uDne lage hain git

jhulon se hain saje hue sare daraKHt dekh

dushman ki bad-kalami pe kyon barhami bhala

laDte samay tha tera bhi lahja karaKHt dekh

hain meri KHwahishat talabgar jism ki

tu hai mujassama to koi but-parast dekh