aankhon mein KHwab dil mein umid-e-sahar bhi hai

āñkhoñ meñ ḳhvāb dil meñ umīd-e-sahar bhī hai

aur sāmne charāġh-e-sar-e-rahguzar bhī hai

raftār kā.enāt kī kuchh tez-tar bhī hai

ho jaa.e hādisa na koī ab ye Dar bhī hai

mehvar pe apne ghūme hai raqqāsa-e-zamīñ

sāñsoñ ke zer-o-bam kā rutoñ par asar bhī hai

aao palaT ke chalte haiñ phir bazm-e-yār meñ

kyā jā ke chhoḌ aa.e vahāñ kuchh ḳhabar bhī hai

is fasl-e-gul meñ Thahrā hai milnā kisī se jab

dar-pesh ham ko dasht-e-junūñ kā safar bhī hai

kyoñ chheḌiye surūd-e-ġham-e-zīst phir 'nafīs'

kāñToñ se bach ke chaliye ki aisī Dagar bhī hai

aankhon mein KHwab dil mein umid-e-sahar bhi hai

aur samne charagh-e-sar-e-rahguzar bhi hai

raftar kaenat ki kuchh tez-tar bhi hai

ho jae hadisa na koi ab ye Dar bhi hai

mehwar pe apne ghume hai raqqasa-e-zamin

sanson ke zer-o-bam ka ruton par asar bhi hai

aao palaT ke chalte hain phir bazm-e-yar mein

kya ja ke chhoD aae wahan kuchh KHabar bhi hai

is fasl-e-gul mein Thahra hai milna kisi se jab

dar-pesh hum ko dasht-e-junun ka safar bhi hai

kyon chheDiye surud-e-gham-e-zist phir 'nafis'

kanTon se bach ke chaliye ki aisi Dagar bhi hai