آنکھوں میں خواب دل میں امید سحر بھی ہے

آنکھوں میں خواب دل میں امید سحر بھی ہے

اور سامنے چراغ سر رہ گزر بھی ہے

رفتار کائنات کی کچھ تیز تر بھی ہے

ہو جائے حادثہ نہ کوئی اب یہ ڈر بھی ہے

محور پہ اپنے گھومے ہے رقاصۂ زمیں

سانسوں کے زیر و بم کا رتوں پر اثر بھی ہے

آؤ پلٹ کے چلتے ہیں پھر بزم یار میں

کیا جا کے چھوڑ آئے وہاں کچھ خبر بھی ہے

اس فصل گل میں ٹھہرا ہے ملنا کسی سے جب

در پیش ہم کو دشت جنوں کا سفر بھی ہے

کیوں چھیڑئیے سرود غم زیست پھر نفیسؔ

کانٹوں سے بچ کے چلئے کہ ایسی ڈگر بھی ہے