aao ki ab to jurat-e-jurm-e-suKHan karen

aao ki ab to jur.at-e-jurm-e-suḳhan kareñ

fikr-e-suḳhan ko chhoḌ ke fikr-e-chaman kareñ

dāman guloñ ke chaak haiñ kaliyāñ haiñ dil-figār

ḳhāmosh rah ke zulm ye kab tak sahan kareñ

parvāz par hai rok chahaknā bhī hai gunāh

kab tak qubūl ham ye nizām-e-chaman kareñ

kaafī nahīñ hai ḳhidmat-e-lauh-o-qalam faqat

ab vaqt hai ki ḳhidmat-e-dār-o-rasan kareñ

auhām ke añdheroñ ko jaḌ se ukhāḌ kar

raushan charāġh-e-haq se fazā-e-vatan kareñ

lāshoñ ke Dher par jo siyāsat haiñ kar rahe

un qātiloñ se paak ye arz-e-vatan kareñ

rishiyoñ kī sarzamīñ pe luTeroñ kā raaj hai

āzād aao vādī-e-gang-o-jaman kareñ

kab se lahūluhān hai vaadī chinār kī

ābād phir se aao vo rashk-e-'adan kareñ

kab tak laḌeñge apne paḌosī se dosto

le de ke ḳhatm kyoñ na fasād-e-kuhan kareñ

shaitān ko akele harānā muhāl hai

mil kar chalo muqābla-e-ahraman kareñ

ahl-e-vatan ko niiñd se bedār jo kare

ahl-e-suḳhan bhī aaj numāyāñ vo fan kareñ

mazlūm ke bachāv meñ laḌnā hī hai jihād

mauqa' mile to ham bhī fidā jān-o-tan kareñ

jo hukm-nāme aur jo fatve sunāte haiñ

aao ki aaj band vo saare dahan kareñ

dekho na past hoñ kabhī yaaro ye hausle

baaqī hai buuñd ḳhuun kī jab tak jatan kareñ

aao ki ab to jurat-e-jurm-e-suKHan karen

fikr-e-suKHan ko chhoD ke fikr-e-chaman karen

daman gulon ke chaak hain kaliyan hain dil-figar

KHamosh rah ke zulm ye kab tak sahan karen

parwaz par hai rok chahakna bhi hai gunah

kab tak qubul hum ye nizam-e-chaman karen

kafi nahin hai KHidmat-e-lauh-o-qalam faqat

ab waqt hai ki KHidmat-e-dar-o-rasan karen

auham ke andheron ko jaD se ukhaD kar

raushan charagh-e-haq se faza-e-watan karen

lashon ke Dher par jo siyasat hain kar rahe

un qatilon se pak ye arz-e-watan karen

rishiyon ki sarzamin pe luTeron ka raj hai

aazad aao wadi-e-gang-o-jaman karen

kab se lahuluhan hai wadi chinar ki

aabaad phir se aao wo rashk-e-'adan karen

kab tak laDenge apne paDosi se dosto

le de ke KHatm kyon na fasad-e-kuhan karen

shaitan ko akele harana muhaal hai

mil kar chalo muqabla-e-ahraman karen

ahl-e-watan ko nind se bedar jo kare

ahl-e-suKHan bhi aaj numayan wo fan karen

mazlum ke bachaw mein laDna hi hai jihad

mauqa' mile to hum bhi fida jaan-o-tan karen

jo hukm-name aur jo fatwe sunate hain

aao ki aaj band wo sare dahan karen

dekho na past hon kabhi yaro ye hausle

baqi hai bund KHun ki jab tak jatan karen