آپ جاتے ہیں تو ویران پڑے رہتے ہیں

آپ جاتے ہیں تو ویران پڑے رہتے ہیں

دیر تک ہم یوں ہی بے جان پڑے رہتے ہیں

اک طرف ظلم کا بازار سجا رہتا ہے

اک طرف منصف و میزان پڑے رہتے ہیں

اجنبیت ہے کہ بڑھتی ہی چلی جاتی ہے

اپنے گھر آ کے بھی مہمان پڑے رہتے ہیں

رات ہر پل ہمیں مصلوب کئے رکھتی ہے

سب سمجھتے ہیں کہ آسان پڑے رہتے ہیں

ہر گھڑی ایک عدالت سی لگی رہتی ہے

ہر گھڑی ہم پس زندان پڑے رہتے ہیں

لوگ پھونکوں سے ڈرا کر اسے خوش ہوتے ہیں

جس کے قدموں تلے طوفان پڑے رہتے ہیں