aariz-e-yar nahin aks-fagan pani mein

āriz-e-yār nahīñ aks-fagan paanī meñ

gul-e-shādāb kā phūlā hai chaman paanī meñ

āh-e-sozāñ ho agar sho.ala-fagan paanī meñ

aag kis tarah se paidā ho jalan paanī meñ

zulf-e-mushkīñ ke tasavvur meñ agar rotā maiñ

Duub jaatā abhī sahrā-e-ḳhutan paanī meñ

aao shāyad ki lab-e-hauz haiñ zulfeñ kholīñ

nazar aatā hai mujhe chāñd-gahan paanī meñ

paan khā kar jo vo muñh dho.e kanār-e-dariyā

sang-reze hue abhī la.al-e-yaman paanī meñ

machhliyāñ saikḌoñ misl-e-dil-e-ushshāq phañseñ

gar khule kākul-e-pur-pech-o-shikan paanī meñ

ātish-e-rashk se aġhyār jale jaate haiñ

mujh se chhīñTeñ na laḌo mushfiq-e-man paanī meñ

josh-e-girya jo yahī hai to falak misl-e-habāb

Duub jā.egā ba-yak chashm-zadan paanī meñ

baiThtā hai mirā yuuñ shiddat-e-girya se dil

jaise baiThe koī dīvār-e-kuhan paanī meñ

ābdār aisī ġhazal likkhī ki 'bāqī' jo suneñ

pheñk deñ apnā kalām ahl-e-suḳhan paanī meñ

aariz-e-yar nahin aks-fagan pani mein

gul-e-shadab ka phula hai chaman pani mein

aah-e-sozan ho agar shoala-fagan pani mein

aag kis tarah se paida ho jalan pani mein

zulf-e-mushkin ke tasawwur mein agar rota main

Dub jata abhi sahra-e-KHutan pani mein

aao shayad ki lab-e-hauz hain zulfen kholin

nazar aata hai mujhe chand-gahan pani mein

pan kha kar jo wo munh dhoe kanar-e-dariya

sang-reze hue abhi lal-e-yaman pani mein

machhliyan saikDon misl-e-dil-e-ushshaq phansen

gar khule kakul-e-pur-pech-o-shikan pani mein

aatish-e-rashk se aghyar jale jate hain

mujh se chhinTen na laDo mushfiq-e-man pani mein

josh-e-girya jo yahi hai to falak misl-e-habab

Dub jaega ba-yak chashm-zadan pani mein

baiThta hai mera yun shiddat-e-girya se dil

jaise baiThe koi diwar-e-kuhan pani mein

aabdar aisi ghazal likkhi ki 'baqi' jo sunen

phenk den apna kalam ahl-e-suKHan pani mein