aariz ka rang ya teri zulfon ke bal nahin

'āriz kā rang yā tirī zulfoñ ke bal nahīñ

kaise kahūñ ki merī ġhazal ab ġhazal nahīñ

ye jānte hue bhī ki vā'de aTal nahīñ

majbūr-e-e'tibār ke māthe pe bal nahīñ

shāyad mirī hayāt kā mausam badal gayā

ab aarzū kī jhiil meñ dil kā kañval nahīñ

rātoñ kī niiñd se mirī āñkhoñ ko bair hai

ai dil mirī du'āoñ kā ye to badal nahīñ

pahle the vaise log zamāne meñ ab kahāñ

is vāste rivāj-e-vafā āj-kal nahīñ

patthar baras rahe the ye kahte hue vahāñ

is peḌ ko jalāo koī jis pe phal nahīñ

aapas meñ rasm-o-rāh baḌhāne ke vāste

lāzim ye hai ki log kareñ āj-kal nahīñ

us chiiz kī tarah hai na hoñ jis ke ḳhvāst-gār

vo shaḳhs jis meñ quvvat-e-'azm-o-'amal nahīñ

bazm-e-nashāt-e-yār meñ rone ko aa ga.e

'manzil' tumhārī baat bhī kuchh bar-mahal nahīñ

'ariz ka rang ya teri zulfon ke bal nahin

kaise kahun ki meri ghazal ab ghazal nahin

ye jaante hue bhi ki wa'de aTal nahin

majbur-e-e'tibar ke mathe pe bal nahin

shayad meri hayat ka mausam badal gaya

ab aarzu ki jhil mein dil ka kanwal nahin

raaton ki nind se meri aankhon ko bair hai

ai dil meri du'aon ka ye to badal nahin

pahle the waise log zamane mein ab kahan

is waste riwaj-e-wafa aaj-kal nahin

patthar baras rahe the ye kahte hue wahan

is peD ko jalao koi jis pe phal nahin

aapas mein rasm-o-rah baDhane ke waste

lazim ye hai ki log karen aaj-kal nahin

us chiz ki tarah hai na hon jis ke KHwast-gar

wo shaKHs jis mein quwwat-e-'azm-o-'amal nahin

bazm-e-nashat-e-yar mein rone ko aa gae

'manzil' tumhaari baat bhi kuchh bar-mahal nahin