عارض کا رنگ یا تری زلفوں کے بل نہیں

عارض کا رنگ یا تری زلفوں کے بل نہیں

کیسے کہوں کہ میری غزل اب غزل نہیں

یہ جانتے ہوئے بھی کہ وعدے اٹل نہیں

مجبور اعتبار کے ماتھے پہ بل نہیں

شاید مری حیات کا موسم بدل گیا

اب آرزو کی جھیل میں دل کا کنول نہیں

راتوں کی نیند سے مری آنکھوں کو بیر ہے

اے دل مری دعاؤں کا یہ تو بدل نہیں

پہلے تھے ویسے لوگ زمانے میں اب کہاں

اس واسطے رواج وفا آج کل نہیں

پتھر برس رہے تھے یہ کہتے ہوئے وہاں

اس پیڑ کو جلاؤ کوئی جس پہ پھل نہیں

آپس میں رسم و راہ بڑھانے کے واسطے

لازم یہ ہے کہ لوگ کریں آج کل نہیں

اس چیز کی طرح ہے نہ ہوں جس کے خواست گار

وہ شخص جس میں قوت عزم و عمل نہیں

بزم نشاط یار میں رونے کو آ گئے

منزلؔ تمہاری بات بھی کچھ بر محل نہیں