aarzu ko dil hi dil mein ghuT ke rahna aa gaya
![Anand Narayan Mulla Anand Narayan Mulla](https://rekhta.pc.cdn.bitgravity.com/Images/Shayar/round/anand-narayan-mulla.png)
aarzu ko dil hi dil mein ghuT ke rahna aa gaya
Anand Narayan Mulla
MORE BYAnand Narayan Mulla
Interesting Fact
February 1945
aarzū ko dil hī dil meñ ghuT ke rahnā aa gayā
aur vo ye samjhe ki mujh ko rañj sahnā aa gayā
poñchhtā koī nahīñ ab mujh se merā hāl-e-dil
shāyad apnā hāl-e-dil ab mujh ko kahnā aa gayā
sab kī suntā jā rahā huuñ aur kuchh kahtā nahīñ
vo zabāñ huuñ ab jise dāñtoñ meñ rahnā aa gayā
zindagī se kyā laḌeñ jab koī bhī apnā nahīñ
ho ke shal dhāre ke ruḳh par ham ko bahnā aa gayā
laakh parde iztirāb-e-shauq par Daale magar
phir vo ik machlā huā aañsū barahnā aa gayā
tujh ko apnā hī liyā āḳhir nigār-e-ishq ne
ai urūs-e-chashm le motī kā gahnā aa gayā
pī ke aañsū sī ke lab baiThā huuñ yuuñ is bazm meñ
dar-haqīqat jaise mujh ko rañj sahnā aa gayā
ek nā-shukre chaman ko rañg-o-bū detā rahā
aa gayā haañ aa gayā kāñToñ meñ rahnā aa gayā
lab pe naġhma aur ruḳh par ik tabassum kī naqāb
apne dil kā dard ab 'mullā' ko kahnā aa gayā
aarzu ko dil hi dil mein ghuT ke rahna aa gaya
aur wo ye samjhe ki mujh ko ranj sahna aa gaya
ponchhta koi nahin ab mujh se mera haal-e-dil
shayad apna haal-e-dil ab mujh ko kahna aa gaya
sab ki sunta ja raha hun aur kuchh kahta nahin
wo zaban hun ab jise danton mein rahna aa gaya
zindagi se kya laDen jab koi bhi apna nahin
ho ke shal dhaare ke ruKH par hum ko bahna aa gaya
lakh parde iztirab-e-shauq par Dale magar
phir wo ek machla hua aansu barahna aa gaya
tujh ko apna hi liya aaKHir nigar-e-ishq ne
ai urus-e-chashm le moti ka gahna aa gaya
pi ke aansu si ke lab baiTha hun yun is bazm mein
dar-haqiqat jaise mujh ko ranj sahna aa gaya
ek na-shukre chaman ko rang-o-bu deta raha
aa gaya han aa gaya kanTon mein rahna aa gaya
lab pe naghma aur ruKH par ek tabassum ki naqab
apne dil ka dard ab 'mulla' ko kahna aa gaya
- Book : Kulliyat-e-Anand Narayan Mulla (Pg. 281)
- Author : Khaliq Anjum
- Publication : National Council for Promotion of Urdu Language-NCPUL (2010)
- Edition : 2010
Additional information available
Click on the INTERESTING button to view additional information associated with this sher.
About this sher
Lorem ipsum dolor sit amet, consectetur adipiscing elit. Morbi volutpat porttitor tortor, varius dignissim.
rare Unpublished content
This ghazal contains ashaar not published in the public domain. These are marked by a red line on the left.