aarzu mehrban hai kis ki

aarzū mehrbān hai kis kī

merī ġhazloñ meñ jaan hai kis kī

tum ne dekhā use to sochā bhī

jaan hai aur jaan hai kis kī

haa.e kis darja ḳhūb-sūrat hai

zindagī dāstān hai kis kī

baat mā'mūlī hai baḌī lekin

dekh to le zabān hai kis kī

phīkā paḌtā ye husn kā bāzār

kaun mālik dukān hai kis kī

jab talak haiñ zamīñ pe dekhte haiñ

āsmāñ tak uḌaan hai kis kī

terī zulfoñ kā jab se saaya haTā

ab mayassar amaan hai kis kī

kaun chāhegā tum ko Tuut ke ab

aarzū ab javān hai kis kī

'sānī' ash'ār kyā balā ke haiñ

be-ruḳhī mehrbān hai kis kī

aarzu mehrban hai kis ki

meri ghazlon mein jaan hai kis ki

tum ne dekha use to socha bhi

jaan hai aur jaan hai kis ki

hae kis darja KHub-surat hai

zindagi dastan hai kis ki

baat ma'muli hai baDi lekin

dekh to le zaban hai kis ki

phika paDta ye husn ka bazar

kaun malik dukan hai kis ki

jab talak hain zamin pe dekhte hain

aasman tak uDan hai kis ki

teri zulfon ka jab se saya haTa

ab mayassar aman hai kis ki

kaun chahega tum ko Tut ke ab

aarzu ab jawan hai kis ki

'sani' ash'ar kya bala ke hain

be-ruKHi mehrban hai kis ki