aastan se tere apna sar uTha le jaunga

āstāñ se tere apnā sar uThā le jā.ūñgā

ek din ye raah kā patthar uThā le jā.ūñgā

zindagī kī rah-guzar hamvār yā dushvār ho

bār-e-ġham har haal meñ dil par uThā le jā.ūñgā

merī āvāra-ḳhirāmī ke nishāñ rahne bhī do

maiñ inheñ galiyoñ meñ phir aa kar uThā le jā.ūñgā

gardish-e-aflāk tham jā.egī ruk jā.egā vaqt

dasht-e-vahshat meñ jab apnā ghar uThā le jā.ūñgā

sub.h kā thā muntazir aa.ī to huuñ is fikr meñ

ab kahāñ maiñ raat kā bistar uThā le jā.ūñgā

rah gayā hai ab yahī ik mere hisse kā 'ziyā'

dil jo hai har dard kā ḳhūgar uThā le jā.ūñgā

aastan se tere apna sar uTha le jaunga

ek din ye rah ka patthar uTha le jaunga

zindagi ki rah-guzar hamwar ya dushwar ho

bar-e-gham har haal mein dil par uTha le jaunga

meri aawara-KHirami ke nishan rahne bhi do

main inhen galiyon mein phir aa kar uTha le jaunga

gardish-e-aflak tham jaegi ruk jaega waqt

dasht-e-wahshat mein jab apna ghar uTha le jaunga

subh ka tha muntazir aai to hun is fikr mein

ab kahan main raat ka bistar uTha le jaunga

rah gaya hai ab yahi ek mere hisse ka 'ziya'

dil jo hai har dard ka KHugar uTha le jaunga