aastin mein jo basne wale the

āstīñ meñ jo basne vaale the

kyā ḳhabar thī ki Dasne vaale the

tanz-āmez muskurāhaT meñ

mujh pe apne hī hañsne vaale the

dil-farebī ne ham ko luuTā hai

ham kahāñ yuuñ hī phañsne vaale the

us kī chāhat na mil sakī ham ko

'umr bhar ham tarasne vaale the

mere dil ne panāh dī varna

vo kahāñ aur basne vaale the

ham du'ā.eñ agar nahīñ karte

tum pe patthar barasne vaale the

'ishq meñ ham ubhar ga.e 'irfāñ'

ye gumāñ thā ki dhañsne vaale the

aastin mein jo basne wale the

kya KHabar thi ki Dasne wale the

tanz-amez muskurahaT mein

mujh pe apne hi hansne wale the

dil-farebi ne hum ko luTa hai

hum kahan yun hi phansne wale the

us ki chahat na mil saki hum ko

'umr bhar hum tarasne wale the

mere dil ne panah di warna

wo kahan aur basne wale the

hum du'aen agar nahin karte

tum pe patthar barasne wale the

'ishq mein hum ubhar gae 'irfan'

ye guman tha ki dhansne wale the