aate hain aur taswir ho jate hain KHwab

aate haiñ aur tasvīr ho jaate haiñ ḳhvāb

ḳhvāboñ meñ hī tā'bīr ho jaate haiñ ḳhvāb

khilte haiñ āñkhoñ meñ gulāboñ kī tarah

aur dil meñ jā kar tiir ho jaate haiñ ḳhvāb

is ḳhvāb ko āñkhoñ meñ hī Dhāñpe rakho

khulne se be-tauqīr ho jaate haiñ ḳhvāb

zanjīr kartā hai koī manzar mujhe

phir daf'atan zanjīr ho jaate haiñ ḳhvāb

is raah par duniyā kī is shahrāh par

ham se ka.ī dil-gīr ho jaate haiñ ḳhvāb

chaltā huuñ lekin niiñd ke narġhe meñ huuñ

likhtā nahīñ tahrīr ho jaate haiñ ḳhvāb

khultī haiñ jab āñkheñ to dikhtā kuchh nahīñ

sab 'āftāb' aur 'mīr' ho jaate haiñ ḳhvāb

aate hain aur taswir ho jate hain KHwab

KHwabon mein hi ta'bir ho jate hain KHwab

khilte hain aankhon mein gulabon ki tarah

aur dil mein ja kar tir ho jate hain KHwab

is KHwab ko aankhon mein hi Dhanpe rakho

khulne se be-tauqir ho jate hain KHwab

zanjir karta hai koi manzar mujhe

phir daf'atan zanjir ho jate hain KHwab

is rah par duniya ki is shahrah par

hum se kai dil-gir ho jate hain KHwab

chalta hun lekin nind ke narghe mein hun

likhta nahin tahrir ho jate hain KHwab

khulti hain jab aankhen to dikhta kuchh nahin

sab 'aftab' aur 'mir' ho jate hain KHwab