aate jate log hamein kyun dost purane lagte hain

aate jaate log hameñ kyuuñ dost purāne lagte haiñ

chāhat kī is had par yārab ham to divāne lagte hai

sunñe vaalā koī agar hotā kahte dil kī bātoñ ko

us ke binā to aaj adhūre apne fasāne lagte haiñ

phir se bahāreñ le kar aa.ī mahkī huī sī yādoñ ko

aa bhī jaao ab milne ke achchhe bahāne lagte haiñ

dil kartā hai phir se dekhūñ kho.e hue us manzar ko

pyāsī āñkho ko vo nazāre kitne suhāne lagte haiñ

ḳhushbū vahī hai rañg vahī hai aaj vafā ke phūloñ kā

aap kyā aa.e phir se chaman meñ din vo purāne lagte haiñ

TuuTī huī sī ek 'kiran' hai kaafī añdhere vāloñ ko

ghar meñ ujālā DhūñDhne vaale ghar ko sajāne lagte hai

aate jate log hamein kyun dost purane lagte hain

chahat ki is had par yarab hum to diwane lagte hai

sunne wala koi agar hota kahte dil ki baaton ko

us ke bina to aaj adhure apne fasane lagte hain

phir se bahaaren le kar aai mahki hui si yaadon ko

aa bhi jao ab milne ke achchhe bahane lagte hain

dil karta hai phir se dekhun khoe hue us manzar ko

pyasi aankho ko wo nazare kitne suhane lagte hain

KHushbu wahi hai rang wahi hai aaj wafa ke phulon ka

aap kya aae phir se chaman mein din wo purane lagte hain

TuTi hui si ek 'kiran' hai kafi andhere walon ko

ghar mein ujala DhunDhne wale ghar ko sajaane lagte hai