aayat nahin chhoDi koi mantar nahin chhoDa

aayat nahīñ chhoḌī koī mantar nahīñ chhoḌā

par dukh kī havāoñ ne mirā ghar nahīñ chhoḌā

maiñ ḳhud hī chalā aayā sar-e-dasht-e-mohabbat

ye saañp kisī ne mire uupar nahīñ chhoḌā

baiThā huuñ har ik shaḳhs nikāle hue dil se

is phone meñ aaj ek bhī number nahīñ chhoḌā

kuchh apne sabab bhī maiñ zarā rah gayā pīchhe

kuchh tum ne bhī duniyā ke barābar nahīñ chhoḌā

mujh ko hī udāsī ne nahīñ ḳhushk kiyā hai

is dhuup ne koī bhī samundar nahīñ chhoḌā

bachpan se mire saath hai saa.e kī tarah 'mehr'

qarze ne mirā haath pakaḌ kar nahīñ chhoḌā

aayat nahin chhoDi koi mantar nahin chhoDa

par dukh ki hawaon ne mera ghar nahin chhoDa

main KHud hi chala aaya sar-e-dasht-e-mohabbat

ye sanp kisi ne mere upar nahin chhoDa

baiTha hun har ek shaKHs nikale hue dil se

is phone mein aaj ek bhi number nahin chhoDa

kuchh apne sabab bhi main zara rah gaya pichhe

kuchh tum ne bhi duniya ke barabar nahin chhoDa

mujh ko hi udasi ne nahin KHushk kiya hai

is dhup ne koi bhi samundar nahin chhoDa

bachpan se mere sath hai sae ki tarah 'mehr'

qarze ne mera hath pakaD kar nahin chhoDa