آزمانے کی زمانے کو ضرورت کیا ہے

آزمانے کی زمانے کو ضرورت کیا ہے

ہم سے پوچھو تو بتا دیں گے محبت کیا ہے

ہم نے پیر اور فقیروں سے بہت پوچھا مگر

جب ہوا عشق تو جانا کہ عبادت کیا ہے

ہم کو آتا نہیں خاموشیاں پڑھنے کا ہنر

وہ ہی بتلا دیں انہیں ہم سے شکایت کیا ہے

میری غزلیں وہ پڑھیں گے تو سمجھ جائیں گے

بندگی کیا ہے جنوں کیا ہے عقیدت کیا ہے

آپ نے جس کو فرشتے کا دیا تھا درجہ

اس کی انسانوں سی فطرت ہے تو حیرت کیا ہے

ان سے بچھڑے تو امتؔ آیا سمجھ یہ ہم کو

شاخ سے ٹوٹے ہوئے پتوں کی قیمت کیا ہے