ab bhanwar hai ya kinara hai KHuda jaanta hai

ab bhañvar hai yā kinārā hai ḳhudā jāntā hai

bas mujhe terā sahārā hai ḳhudā jāntā hai

ye alag baat ki ḳhush-bāsh nazar aate haiñ

varna jo haal hamārā hai ḳhudā jāntā hai

apnī tanhā.iyoñ se Dar ke ka.ī baar tujhe

jis tarah maiñ ne pukārā hai ḳhudā jāntā hai

vo bhī is tark-e-ta'alluq pe hai ḳhush aur idhar

ham ne bhī bojh utārā hai ḳhudā jāntā hai

yā'nī ab din meñ bhī taare vo dikhātā hai mujhe

jo mirī aañkh kā taarā hai ḳhudā jāntā hai

vo palaT kar kabhī dekhegā mirī samt zarūr

mujh ko is vahm ne maarā hai ḳhudā jāntā hai

terā har dard sitam terī 'ināyat 'mānī'

terā har zaḳhm gavārā hai ḳhudā jāntā hai

ab bhanwar hai ya kinara hai KHuda jaanta hai

bas mujhe tera sahaara hai KHuda jaanta hai

ye alag baat ki KHush-bash nazar aate hain

warna jo haal hamara hai KHuda jaanta hai

apni tanhaiyon se Dar ke kai bar tujhe

jis tarah main ne pukara hai KHuda jaanta hai

wo bhi is tark-e-ta'alluq pe hai KHush aur idhar

hum ne bhi bojh utara hai KHuda jaanta hai

ya'ni ab din mein bhi tare wo dikhata hai mujhe

jo meri aankh ka tara hai KHuda jaanta hai

wo palaT kar kabhi dekhega meri samt zarur

mujh ko is wahm ne mara hai KHuda jaanta hai

tera har dard sitam teri 'inayat 'mani'

tera har zaKHm gawara hai KHuda jaanta hai