اب ہم کو نہیں دیکھنے یہ خواب وغیرہ

اب ہم کو نہیں دیکھنے یہ خواب وغیرہ

ہر سمت نظر آتے ہیں زہراب وغیرہ

ان آنکھوں سے پینے کو میسر ہی نہیں تو

ہونا ہی نہیں ہے ہمیں سیراب وغیرہ

محفل نے تری اپنا بھرم تک نہیں رکھا

کیا خاک برتتے ادب آداب وغیرہ

جو درد سہے ساری حسیں مر گئیں شاید

اب دل مرا ہوتا نہیں بیتاب وغیرہ

کس سمت کو ہے کوچ ارادہ ہے کہاں کا

کیوں باندھ کے رکھے ہیں یہ اسباب وغیرہ

چلمن کا کہو بہر خدا پردہ ہٹا لیں

اب اور نہیں باقی تب و تاب وغیرہ

اس واسطے یہ خواب نگر بس نہیں پاتا

آتے ہیں یہاں روز ہی سیلاب وغیرہ

اب دھیان تری سمت لگا رہتا ہے صادقؔ

اب مجھ سے نہیں ہوتی کوئی جاب وغیرہ