ab ke ajab safar pe nikalna paDa mujhe

ab ke 'ajab safar pe nikalnā paḌā mujhe

rāheñ kisī ke naam thiiñ chalnā paḌā mujhe

tārīk shab ne saare sitāre bujhā diye

maiñ sub.h kā charāġh thā jalnā paḌā mujhe

yārān-e-dasht raunaq-e-bāzār ban ga.e

sunsān rāstoñ pe nikalnā paḌā mujhe

har ahl-e-anjuman kī zarūrat thī raushnī

maiñ sham'-e-anjuman thā pighalnā paḌā mujhe

zālim bahut hai shiddat-e-ehsās-e-āgahī

aksar parā.ī aag meñ jalnā paḌā mujhe

rāhoñ ke pech-o-ḳham meñ balā ke tilism the

chalnā baḌā muhāl thā chalnā paḌā mujhe

āsāñ nahīñ thā zulmat-e-shab se muqābla

sar par jalā ke aag pighalnā paḌā mujhe

ab ke 'ajab safar pe nikalna paDa mujhe

rahen kisi ke nam thin chalna paDa mujhe

tarik shab ne sare sitare bujha diye

main subh ka charagh tha jalna paDa mujhe

yaran-e-dasht raunaq-e-bazar ban gae

sunsan raston pe nikalna paDa mujhe

har ahl-e-anjuman ki zarurat thi raushni

main sham'-e-anjuman tha pighalna paDa mujhe

zalim bahut hai shiddat-e-ehsas-e-agahi

aksar parai aag mein jalna paDa mujhe

rahon ke pech-o-KHam mein bala ke tilism the

chalna baDa muhaal tha chalna paDa mujhe

aasan nahin tha zulmat-e-shab se muqabla

sar par jala ke aag pighalna paDa mujhe