ab ke baras bhi qisse banenge kamal ke

ab ke baras bhī qisse baneñge kamāl ke

pichhlā baras gayā hai kaleja nikāl ke

phirte the jin ke kāñdhoñ pe ham haath Daal ke

vo dost ho ga.e haiñ sabhī saaTh saal ke

apnī taraf se sab kī dalīloñ ko Taal ke

manvā le apnī baat ko sikka uchhāl ke

ye ḳhat kisī ko ḳhuun ke aañsū rulā.egā

kāġhaz pe rakh diyā hai kaleja nikāl ke

maanā ki zindagī se bahut pyaar hai magar

kab tak rakhoge kāñch kā bartan sañbhāl ke

ai mīr-e-kārvāñ mujhe muḌ kar na dekh tū

maiñ aa rahā huuñ paañv se kāñTe nikāl ke

tum ko nayā ye saal mubārak ho dosto

maiñ zaḳhm gin rahā huuñ abhī pichhle saal ke

ġham kī tarah ḳhushī meñ na ronā paḌe kahīñ

rakhnā 'ḳhalīl' ek do aañsū sañbhāl ke

ab ke baras bhi qisse banenge kamal ke

pichhla baras gaya hai kaleja nikal ke

phirte the jin ke kandhon pe hum hath Dal ke

wo dost ho gae hain sabhi saTh sal ke

apni taraf se sab ki dalilon ko Tal ke

manwa le apni baat ko sikka uchhaal ke

ye KHat kisi ko KHun ke aansu rulaega

kaghaz pe rakh diya hai kaleja nikal ke

mana ki zindagi se bahut pyar hai magar

kab tak rakhoge kanch ka bartan sanbhaal ke

ai mir-e-karwan mujhe muD kar na dekh tu

main aa raha hun panw se kanTe nikal ke

tum ko naya ye sal mubarak ho dosto

main zaKHm gin raha hun abhi pichhle sal ke

gham ki tarah KHushi mein na rona paDe kahin

rakhna 'KHalil' ek do aansu sanbhaal ke