ab ke ghar lauTa to sab badle hue manzar mile

ab ke ghar lauTā to sab badle hue manzar mile

bistaroñ par gard thī bosīda bām-o-dar mile

zālimoñ ne haq-parastī kā liyā jab imtihāñ

daar par ham jāñ-nisārān-e-vatan ke sar mile

āsmāñ ko oḌh kar so jā.iye fōtpath par

kyā zarūrī hai ki har be-ghar ko ik chādar mile

dostoñ se ham ne chāhī thī pazīrā.ī magar

tanz meñ lipTe hue alfāz ke nashtar mile

shāyad ab kī baar ham ko dekh kar pahchān le

vo vafā-nā-āshnā mumkin hai ḳhud baḌh kar mile

ik musalsal justujū hai aur ḳhvāboñ kā safar

ik zamāna ho gayā hai ham ko apnā ghar mile

garmī-e-zauq-e-‘amal tujh ko mubārak rāh-rau

baat to jab hai ki manzil tujh se ḳhud aa kar mile

khiḌkiyāñ kholī ga.ī thiiñ raushnī ke vāste

aur natīja ye huā sho'loñ kī zad meñ ghar mile

shaan hai is vaqt 'razmī' ‘azmat-e-kirdār kī

jo tirī dastār chhīne us ko terā sar mile

ab ke ghar lauTa to sab badle hue manzar mile

bistaron par gard thi bosida baam-o-dar mile

zalimon ne haq-parasti ka liya jab imtihan

dar par hum jaan-nisaran-e-watan ke sar mile

aasman ko oDh kar so jaiye footpath par

kya zaruri hai ki har be-ghar ko ek chadar mile

doston se hum ne chahi thi pazirai magar

tanz mein lipTe hue alfaz ke nashtar mile

shayad ab ki bar hum ko dekh kar pahchan le

wo wafa-na-ashna mumkin hai KHud baDh kar mile

ek musalsal justuju hai aur KHwabon ka safar

ek zamana ho gaya hai hum ko apna ghar mile

garmi-e-zauq-e-‘amal tujh ko mubarak rah-rau

baat to jab hai ki manzil tujh se KHud aa kar mile

khiDkiyan kholi gai thin raushni ke waste

aur natija ye hua sho'lon ki zad mein ghar mile

shan hai is waqt 'razmi' ‘azmat-e-kirdar ki

jo teri dastar chhine us ko tera sar mile