ab ki mumkin nahin bin tere guzara ho jae

ab ki mumkin nahīñ bin tere guzārā ho jaa.e

phir koī chaal ki jis se tū hamārā ho jaa.e

'ishq meñ had se guzar jaao to aatā hai maqām

aañkh se ashk gire aur sitārā ho jaa.e

tum ai bilqīs na aao mire hisse meñ bhale

koī vā'da ki faqīroñ kā guzārā ho jaa.e

ai mirī jaan nikal parda-e-aflāk se tū

Dūbte shaḳhs ko tinke kā sahārā ho jaa.e

ham bhī ban jā.eñge hiire ye jahāñ dekhegā

ham sā patthar jo kahīñ un ko gavārā ho jaa.e

maiñ tumheñ pā na sakūñ tum mujhe apnā na sako

phir yahī khel mirī jaan dubāra ho jaa.e

ab ki mumkin nahin bin tere guzara ho jae

phir koi chaal ki jis se tu hamara ho jae

'ishq mein had se guzar jao to aata hai maqam

aankh se ashk gire aur sitara ho jae

tum ai bilqis na aao mere hisse mein bhale

koi wa'da ki faqiron ka guzara ho jae

ai meri jaan nikal parda-e-aflak se tu

Dubte shaKHs ko tinke ka sahaara ho jae

hum bhi ban jaenge hire ye jahan dekhega

hum sa patthar jo kahin un ko gawara ho jae

main tumhein pa na sakun tum mujhe apna na sako

phir yahi khel meri jaan dubara ho jae