ab nahin hai shairi mahdud bas mahbub tak

ab nahīñ hai shā'irī mahdūd bas mahbūb tak

aaj ke shā'ir haiñ pahuñche nit-na.e uslūb tak

ek bas ham hī nahīñ haiñ hijr ke maare yahāñ

silsila ye pohñchtā hai hazrat-e-yāqūb tak

log kyoñ badnām karne par tule haiñ ab use

naam bhī jis kā nahīñ mujh se huā mansūb tak

vaqt kyā badlā ki yuuñ karne lage ḳhāna-ḳharāb

jām-e-jam piite the jo pahuñche haiñ ab mashrūb tak

ghar ko jaanā paḌ gayā hai chhoḌ kar dasht-e-junūñ

hai safar darpesh ham ko ḳhūb-tar se ḳhuub tak

aise logoñ par bhalā kaise na phir aa.eñ 'azāb

jo gunah karne ko bhī samjheñ nahīñ mā'yūb tak

ham ne jaanā hai kahāñ 'shahzād' masjid ke sivā

tāliboñ kī dauḌ hotī hai faqat matlūb tak

ab nahin hai sha'iri mahdud bas mahbub tak

aaj ke sha'ir hain pahunche nit-nae uslub tak

ek bas hum hi nahin hain hijr ke mare yahan

silsila ye pohnchta hai hazrat-e-yaqub tak

log kyon badnam karne par tule hain ab use

nam bhi jis ka nahin mujh se hua mansub tak

waqt kya badla ki yun karne lage KHana-KHarab

jam-e-jam pite the jo pahunche hain ab mashrub tak

ghar ko jaana paD gaya hai chhoD kar dasht-e-junun

hai safar darpesh hum ko KHub-tar se KHub tak

aise logon par bhala kaise na phir aaen 'azab

jo gunah karne ko bhi samjhen nahin ma'yub tak

hum ne jaana hai kahan 'shahzad' masjid ke siwa

talibon ki dauD hoti hai faqat matlub tak