ab to har chiz nazar aati hai KHwabon jaisi

ab to har chiiz nazar aatī hai ḳhvāboñ jaisī

bas rahī hai koī shai āñkhoñ meñ nīñdoñ jaisī

aaj māthe pe shikan ubhrī hai dekho to sahī

teḌhī-meḌhī mire hāthoñ kī lakīroñ jaisī

haar phūloñ ke bahut shauq se pahne ham ne

vo latāfat na vo ḳhushbū tirī bāñhoñ jaisī

in ishāroñ meñ kināyoñ meñ hai kyā lutf-e-kalām

harkateñ karte ho bekār hī gūñgoñ jaisī

aise hālāt meñ sūjhegī bhī kyā baat na.ī

kaifiyat zehn kī jab ho tahī jeboñ jaisī

ye koī Dhoñg nayā tum ne rachāyā to nahīñ

shakl kyoñ apnī banā lī hai marīzoñ jaisī

log dā've to bahut karte haiñ ūñche-ūñche

zindagī apnī banā.eñ to rasūloñ jaisī

ab to har chiz nazar aati hai KHwabon jaisi

bas rahi hai koi shai aankhon mein nindon jaisi

aaj mathe pe shikan ubhri hai dekho to sahi

teDhi-meDhi mere hathon ki lakiron jaisi

haar phulon ke bahut shauq se pahne hum ne

wo latafat na wo KHushbu teri banhon jaisi

in ishaaron mein kinayon mein hai kya lutf-e-kalam

harkaten karte ho bekar hi gungon jaisi

aise haalat mein sujhegi bhi kya baat nai

kaifiyat zehn ki jab ho tahi jebon jaisi

ye koi Dhong naya tum ne rachaya to nahin

shakl kyon apni bana li hai marizon jaisi

log da'we to bahut karte hain unche-unche

zindagi apni banaen to rasulon jaisi