ab to le de ke yahi ek hunar mera hai

ab to le de ke yahī ek hunar merā hai

āsmāñ had hai to uThtā huā sar merā hai

iiñT se iiñT jo bajtī sī nazar aa.e kahīñ

vo 'imārat hī samajh lījiye ghar merā hai

ye bayābān ye sahrā ye samundar ye saḌak

sab ko rad kar ke guzarne kā safar merā hai

ye fasādāt mire ḳhuun ke pyāse haiñ faqat

jo badan bhī hai kahīñ ḳhuun meñ tar merā hai

ai ḳhudā ‘ālam-e-aflāk kā ahvāl sunā

is zamīñ par to sunā hai ki asar merā hai

bebasī ashk bahātī hai mirī mayyat par

dhaḌ kahīñ kaT ke girā hai kahīñ sar merā hai

kyā yahī hai mirī mā'sūm mohabbat kā gunāh

ashk bhī mere garebān bhī tar merā hai

'irtizā' aise bhī jumle the kahīñ tum ne sune

laash ye mere patī kī ye pisar merā hai

ab to le de ke yahi ek hunar mera hai

aasman had hai to uThta hua sar mera hai

inT se inT jo bajti si nazar aae kahin

wo 'imarat hi samajh lijiye ghar mera hai

ye bayaban ye sahra ye samundar ye saDak

sab ko rad kar ke guzarne ka safar mera hai

ye fasadat mere KHun ke pyase hain faqat

jo badan bhi hai kahin KHun mein tar mera hai

ai KHuda ‘alam-e-aflak ka ahwal suna

is zamin par to suna hai ki asar mera hai

bebasi ashk bahati hai meri mayyat par

dhaD kahin kaT ke gira hai kahin sar mera hai

kya yahi hai meri ma'sum mohabbat ka gunah

ashk bhi mere gareban bhi tar mera hai

'irtiza' aise bhi jumle the kahin tum ne sune

lash ye mere pati ki ye pisar mera hai