اب تو لے دے کے یہی ایک ہنر میرا ہے

اب تو لے دے کے یہی ایک ہنر میرا ہے

آسماں حد ہے تو اٹھتا ہوا سر میرا ہے

اینٹ سے اینٹ جو بجتی سی نظر آئے کہیں

وہ عمارت ہی سمجھ لیجئے گھر میرا ہے

یہ بیابان یہ صحرا یہ سمندر یہ سڑک

سب کو رد کر کے گزرنے کا سفر میرا ہے

یہ فسادات مرے خون کے پیاسے ہیں فقط

جو بدن بھی ہے کہیں خون میں تر میرا ہے

اے خدا عالم افلاک کا احوال سنا

اس زمیں پر تو سنا ہے کہ اثر میرا ہے

بے بسی اشک بہاتی ہے مری میت پر

دھڑ کہیں کٹ کے گرا ہے کہیں سر میرا ہے

کیا یہی ہے مری معصوم محبت کا گناہ

اشک بھی میرے گریبان بھی تر میرا ہے

ارتضٰیؔ ایسے بھی جملے تھے کہیں تم نے سنے

لاش یہ میرے پتی کی یہ پسر میرا ہے