abhi jhagaDna abhi manana koi sunega to kya kahega

abhī jhagaḌnā abhī manānā koī sunegā to kyā kahegā

jahāñ kā ehsās kuchh to hotā koī sunegā to kyā kahegā

uThā na ab haath ai masīhā koī sunegā to kyā kahegā

huā na tujh se mirā mudāvā koī sunegā to kyā kahegā

jo the payambar masarratoñ ke jo raushnī sab ko bāñTte the

unhī ke ghar meñ hai ab añdherā koī sunegā to kyā kahegā

kabhī zabānoñ pe hai laḌā.ī kabhī 'aqīdoñ pe hāthā-pā.ī

ye haal hai ghar meñ bhā.iyoñ kā koī sunegā to kyā kahegā

kahīñ na uñglī uThe jahāñ kī milo na dil se hameñ gavāra

magar ta'alluq na toḌ denā koī sunegā to kyā kahegā

banī hai merī nazar savālī javāb bhī tum nazar se denā

ye soch kar apne lab hilānā koī sunegā to kyā kahegā

maiñ jāntā huuñ maiñ māntā huuñ kisī se dukh bāñTnā hai achchhā

savāl to hai mirī anā kā koī sunegā to kyā kahegā

batāo ai 'shād' raaz kyā hai ye bahkī bahkī tumhārī bāteñ

ye sar-phiroñ jaisā baḌbaḌānā koī sunegā to kyā kahegā

abhi jhagaDna abhi manana koi sunega to kya kahega

jahan ka ehsas kuchh to hota koi sunega to kya kahega

uTha na ab hath ai masiha koi sunega to kya kahega

hua na tujh se mera mudawa koi sunega to kya kahega

jo the payambar masarraton ke jo raushni sab ko banTte the

unhi ke ghar mein hai ab andhera koi sunega to kya kahega

kabhi zabanon pe hai laDai kabhi 'aqidon pe hatha-pai

ye haal hai ghar mein bhaiyon ka koi sunega to kya kahega

kahin na ungli uThe jahan ki milo na dil se hamein gawara

magar ta'alluq na toD dena koi sunega to kya kahega

bani hai meri nazar sawali jawab bhi tum nazar se dena

ye soch kar apne lab hilana koi sunega to kya kahega

main jaanta hun main manta hun kisi se dukh banTna hai achchha

sawal to hai meri ana ka koi sunega to kya kahega

batao ai 'shad' raaz kya hai ye bahki bahki tumhaari baaten

ye sar-phiron jaisa baDbaDana koi sunega to kya kahega