abhi ranj-e-safar ki ibtida hai

abhī ranj-e-safar kī ibtidā hai

abhī se jī bahut ghabrā rahā hai

diye bujhne lage haiñ tāqchoñ meñ

har ik shai par añdherā chhā rahā hai

havā shāḳhoñ meñ chhup kar ro rahī hai

na jaane kaisā mausam aa rahā hai

ThiThurtī rut meñ zaḳhmī uñgliyoñ se

hameñ dariyā meñ sonā DhūñDhnā hai

isī ummīd par ban-bās kāTeñ

hameñ bhī ek din ghar lauTnā hai

bahut chāhūñ ki maiñ bhī haath uThā.ūñ

mire hoñToñ pe lekin bad-duā hai

abhi ranj-e-safar ki ibtida hai

abhi se ji bahut ghabra raha hai

diye bujhne lage hain taqchon mein

har ek shai par andhera chha raha hai

hawa shaKHon mein chhup kar ro rahi hai

na jaane kaisa mausam aa raha hai

ThiThurti rut mein zaKHmi ungliyon se

hamein dariya mein sona DhunDhna hai

isi ummid par ban-bas kaTen

hamein bhi ek din ghar lauTna hai

bahut chahun ki main bhi hath uThaun

mere honTon pe lekin bad-dua hai