abhi to sath rahta hai meri parchhaiyan ban kar

abhī to saath rahtā hai mirī parchhā.iyāñ ban kar

bichhaḌne par rahegā vo mirī tanhā.iyāñ ban kar

badan par is-qadar bārish mire hotī hai bosoñ kī

ki jab bāñheñ tirī mujh par khulī hoñ Dāliyāñ ban kar

yaqīñ hai jis taraf se terī aamad kā mujhe jānāñ

vahīñ āñkheñ bichhā rakkhī haiñ ghar kī khiḌkiyāñ ban kar

tirī yādoñ se vābasta mirā kamra mirā bistar

vahī yādeñ ubhartī haiñ mirī añgḌā.iyāñ ban kar

ba-zāhir to kabhī nazdīk vo aatā nahīñ mere

magar vo saath rahtā hai mirī tanhā.iyāñ ban kar

abhī to ishq baaqī hai adhūrī hai mohabbat bhī

khanaknā hai abhī hāthoñ meñ terī chūḌiyāñ ban kar

mohazzab jin ko samjhā thā salīqa jin meñ jaanā thā

vahī alfāz nikle haiñ zabāñ se gāliyāñ ban kar

bahut ḳhāmosh rahtā hai kabhī dil kuchh nahīñ kahtā

akele meñ dhaḌaktā hai magar sargoshiyāñ ban kar

ki ātish meñ mohabbat kī badan us kā jale kaise

gale lagtā hai māchis kī vo giilī tīliyāñ ban kar

mohabbat se kabhī tum ne hameñ jo phuul bheje the

kitāboñ meñ vo haiñ mahfūz bikhrī pattiyāñ ban kar

guzarte vaqt ne un kā badan bosīda kar Daalā

vahī jo laḌkiyāñ uḌtī thiiñ yaaro titliyāñ ban kar

jinheñ sūkhā samajh kar tum ne jin par ḳhaak Daalī thī

unhī pattoñ kī rut gūñjī hai ghar meñ tāliyāñ ban kar

vahī sab parchiyāñ jin par tumhārā naam likkhā thā

vahī āñkhoñ meñ chubhtī haiñ hamāre kirchiyāñ ban kar

dahak uTThā badan us kā hamāre sho.ala-e-lab se

jalā lekin badan apnā bhī ātish-bāziyāñ ban kar

masā.il zindagī meñ jo mirī darpesh the ab tak

vo kal shab hal hue lekin mirī rusvā.iyāñ ban kar

abhi to sath rahta hai meri parchhaiyan ban kar

bichhaDne par rahega wo meri tanhaiyan ban kar

badan par is-qadar barish mere hoti hai boson ki

ki jab banhen teri mujh par khuli hon Daliyan ban kar

yaqin hai jis taraf se teri aamad ka mujhe jaanan

wahin aankhen bichha rakkhi hain ghar ki khiDkiyan ban kar

teri yaadon se wabasta mera kamra mera bistar

wahi yaaden ubharti hain meri angDaiyan ban kar

ba-zahir to kabhi nazdik wo aata nahin mere

magar wo sath rahta hai meri tanhaiyan ban kar

abhi to ishq baqi hai adhuri hai mohabbat bhi

khanakna hai abhi hathon mein teri chuDiyan ban kar

mohazzab jin ko samjha tha saliqa jin mein jaana tha

wahi alfaz nikle hain zaban se galiyan ban kar

bahut KHamosh rahta hai kabhi dil kuchh nahin kahta

akele mein dhaDakta hai magar sargoshiyan ban kar

ki aatish mein mohabbat ki badan us ka jale kaise

gale lagta hai machis ki wo gili tiliyan ban kar

mohabbat se kabhi tum ne hamein jo phul bheje the

kitabon mein wo hain mahfuz bikhri pattiyan ban kar

guzarte waqt ne un ka badan bosida kar Dala

wahi jo laDkiyan uDti thin yaro titliyan ban kar

jinhen sukha samajh kar tum ne jin par KHak Dali thi

unhi patton ki rut gunji hai ghar mein taliyan ban kar

wahi sab parchiyan jin par tumhaara nam likkha tha

wahi aankhon mein chubhti hain hamare kirchiyan ban kar

dahak uTTha badan us ka hamare shoala-e-lab se

jala lekin badan apna bhi aatish-baziyan ban kar

masail zindagi mein jo meri darpesh the ab tak

wo kal shab hal hue lekin meri ruswaiyan ban kar