afsurda bahut hai dil-e-nakaam bahut hai

afsurda bahut hai dil-e-nākām bahut hai

kaT jaa.e agar ḳhair se ye shaam bahut hai

dard-e-dil-e-betāb kā socho na mudāvā

yaaro mujhe is dard meñ ārām bahut hai

hamrāh mire tujh ko kisī ne nahīñ dekhā

kahne ko tire saath mirā naam bahut hai

sochā huā puurā kabhī hone nahīñ detā

ye vaqt jo is kaam meñ badnām bahut hai

kuchh karne kī zahmat na kareñ aap gavārā

Dhāne ko sitam gardish-e-ayyām bahut hai

har shaḳhs ko haq hai ki har ik shai ko vo jaane

kyā chiiz bahut ḳhaas hai kyā 'aam bahut hai

mā'nī nahīñ ban paḌte kabhī shor-o-shaġhaf ke

daldal kī tarah dil meñ to kohrām bahut hai

sahrā meñ ḳhabar-dār abhī qais na banñā

ai ahl-e-junūñ jazb-e-darūñ ḳhaam bahut hai

sunte haiñ vahī asl meñ shā'ir hai 'nishāte'

mash.hūr bahut hai kahīñ gumnām bahut hai

afsurda bahut hai dil-e-nakaam bahut hai

kaT jae agar KHair se ye sham bahut hai

dard-e-dil-e-betab ka socho na mudawa

yaro mujhe is dard mein aaram bahut hai

hamrah mere tujh ko kisi ne nahin dekha

kahne ko tere sath mera nam bahut hai

socha hua pura kabhi hone nahin deta

ye waqt jo is kaam mein badnam bahut hai

kuchh karne ki zahmat na karen aap gawara

Dhane ko sitam gardish-e-ayyam bahut hai

har shaKHs ko haq hai ki har ek shai ko wo jaane

kya chiz bahut KHas hai kya 'am bahut hai

ma'ni nahin ban paDte kabhi shor-o-shaghaf ke

daldal ki tarah dil mein to kohram bahut hai

sahra mein KHabar-dar abhi qais na banna

ai ahl-e-junun jazb-e-darun KHam bahut hai

sunte hain wahi asl mein sha'ir hai 'nishate'

mashhur bahut hai kahin gumnam bahut hai