agar kuchh waqt mil jata to phir pyasa nahin rahta

agar kuchh vaqt mil jaatā to phir pyāsā nahīñ rahtā

magar hāthoñ meñ mere der tak shīsha nahīñ rahtā

ġham apne Daal kar is meñ sab apnī raah lete haiñ

ziyāda der tak ḳhālī mirā kaasa nahīñ rahtā

ye jīvan to faqat ik silsila hai chakrvyūhoñ kā

yahāñ se bach nikalne kā koī rasta nahīñ rahtā

ye mehmāñ hai ise jaane kī har dam jaldī rahtī hai

mire ghar meñ ziyāda der tak paisa nahīñ rahtā

'ajab sī murdanī hai aur har kone meñ ḳhāmoshī

ye kaisā ghar hai kyā is meñ koī bachcha nahīñ rahtā

haiñ ġhazleñ 'talḳh' kī anmol par jo chāhe le jaa.e

yaqīñ kar is ḳhazāne par koī pahra nahīñ rahtā

agar kuchh waqt mil jata to phir pyasa nahin rahta

magar hathon mein mere der tak shisha nahin rahta

gham apne Dal kar is mein sab apni rah lete hain

ziyaada der tak KHali mera kasa nahin rahta

ye jiwan to faqat ek silsila hai chakrwyuhon ka

yahan se bach nikalne ka koi rasta nahin rahta

ye mehman hai ise jaane ki har dam jaldi rahti hai

mere ghar mein ziyaada der tak paisa nahin rahta

'ajab si murdani hai aur har kone mein KHamoshi

ye kaisa ghar hai kya is mein koi bachcha nahin rahta

hain ghazlen 'talKH' ki anmol par jo chahe le jae

yaqin kar is KHazane par koi pahra nahin rahta