اگر میں وقت سے پہلے بڑا نہیں ہوتا

اگر میں وقت سے پہلے بڑا نہیں ہوتا

تو ایسا حال بھی میرا ہوا نہیں ہوتا

اگر وہ آدمی ضد پر اڑا نہیں ہوتا

تو آج جان سے اپنی گیا نہیں ہوتا

کہ جانتا ہوں اسے اس سے بھی زیادہ میں

مجھے خبر ہے اسے جو پتا نہیں ہوتا

مرے بڑوں نے سکھایا مجھے یہ بچپن میں

بڑا جو کہتا ہو خود کو بڑا نہیں ہوتا

سبق جو ملتا ہے ہم کو ہر ایک ٹھوکر سے

کسی کتاب میں یہ سب لکھا نہیں ہوتا

کرے جو پیچھے برائی برا ہے شخص وہی

برائی منہ پہ کرے جو برا نہیں ہوتا

وو آستیں میں تمہیں عمر بھر مکیں رکھتا

جو اس طرح سے نہ مسعودؔ کو ڈسا ہوتا