agar masarrat mein gham ba-farz-e-muhaal aaya to kya karoge

agar masarrat meñ ġham ba-farz-e-muhāl aayā to kyā karoge

har ek lamha sadī ho jis kā vo saal aayā to kyā karoge

ye maiñ ne maanā mire ġhamoñ se tumheñ koī vāsta nahīñ hai

magar kabhī kī navāzishoñ kā ḳhayāl aayā to kyā karoge

jafā agar koī maslahat hai chalo hameñ har jafā gavārā

dil aise nāzuk-tarīn shīshe meñ baal aayā to kyā karoge

mohabbat ik jabr-e-be-amāñ hai ki zor chaltā nahīñ kisī kā

tumhārā dil bhī hamāre dil kī misāl aayā to kyā karoge

'ināyat-e-be-talab se pahle navāzish-e-be-amāñ kī ḳhātir

tumhāre qadmoñ pe har tamanna maiñ Daal aayā to kyā karoge

zamāna naqqād-e-mustaqil hai koī bachā hai na bach sakegā

'urūj kā saath dene vaalo zavāl aayā to kyā karoge

mohabbat ik qadr-e-mushtarak hai 'sirāj' jalnā hai merī qismat

maiñ sochtā huuñ tumhāre dil kā savāl aayā to kyā karoge

agar masarrat mein gham ba-farz-e-muhaal aaya to kya karoge

har ek lamha sadi ho jis ka wo sal aaya to kya karoge

ye main ne mana mere ghamon se tumhein koi wasta nahin hai

magar kabhi ki nawazishon ka KHayal aaya to kya karoge

jafa agar koi maslahat hai chalo hamein har jafa gawara

dil aise nazuk-tarin shishe mein baal aaya to kya karoge

mohabbat ek jabr-e-be-aman hai ki zor chalta nahin kisi ka

tumhaara dil bhi hamare dil ki misal aaya to kya karoge

'inayat-e-be-talab se pahle nawazish-e-be-aman ki KHatir

tumhaare qadmon pe har tamanna main Dal aaya to kya karoge

zamana naqqad-e-mustaqil hai koi bacha hai na bach sakega

'uruj ka sath dene walo zawal aaya to kya karoge

mohabbat ek qadr-e-mushtarak hai 'siraj' jalna hai meri qismat

main sochta hun tumhaare dil ka sawal aaya to kya karoge