agar us koh-e-nida par se ishaara ho jae

agar us koh-e-nidā par se ishāra ho jaa.e

'umr chup-chāp bhī guzre to guzāra ho jaa.e

mujh meñ ābād ka.ī ek sitāre haiñ to kyā

mujh se ābād koī ek sitāra ho jaa.e

shajar-e-jāñ se uḌā kar maiñ jinheñ bhuul gayā

un parinde se agar rabt dobāra ho jaa.e

kise mā'lūm isī dard kī raftār ke saath

dil phir ik jast bhare aur tumhārā ho jaa.e

kashtiyāñ mauj-ba-mauj aatī rahīñ jaatī rahīñ

aisā ābād mire dil kā kināra ho jaa.e

roz-o-shab apne haiñ jis shaḳhs ke vaqt apnā hai

kaise mumkin vo kisī shaam hamārā ho jaa.e

agar us koh-e-nida par se ishaara ho jae

'umr chup-chap bhi guzre to guzara ho jae

mujh mein aabaad kai ek sitare hain to kya

mujh se aabaad koi ek sitara ho jae

shajar-e-jaan se uDa kar main jinhen bhul gaya

un parinde se agar rabt dobara ho jae

kise ma'lum isi dard ki raftar ke sath

dil phir ek jast bhare aur tumhaara ho jae

kashtiyan mauj-ba-mauj aati rahin jati rahin

aisa aabaad mere dil ka kinara ho jae

roz-o-shab apne hain jis shaKHs ke waqt apna hai

kaise mumkin wo kisi sham hamara ho jae