agarche koi bhi andha nahin tha

agarche koī bhī andhā nahīñ thā

likhā dīvār kā paḌhtā nahīñ thā

kuchh aisī barf thī us kī nazar meñ

guzarne ke liye rasta nahīñ thā

tumhī ne kaun sī achchhā.ī kī hai

chalo maanā ki maiñ achchhā nahīñ thā

khulī āñkhoñ se saarī umr dekhā

ik aisā ḳhvāb jo apnā nahīñ thā

maiñ us kī anjuman meñ thā akelā

kisī ne bhī mujhe dekhā nahīñ thā

sahar ke vaqt kaise chhoḌ jaatā

tumhārī yaad thī sapnā nahīñ thā

khaḌī thī raat khiḌkī ke sirhāne

darīche meñ vo chāñd utrā nahīñ thā

diloñ meñ girne vaale ashk chuntā

kahīñ ik jauharī aisā nahīñ thā

kuchh aisī dhuup thī un ke saroñ par

ḳhudā jaise ġharīboñ kā nahīñ thā

abhī harfoñ meñ rañg aate kahāñ se

abhī maiñ ne use likkhā nahīñ thā

thī puurī shakl us kī yaad mujh ko

magar maiñ ne use dekhā nahīñ thā

barahna ḳhvāb the sūraj ke nīche

kisī ummīd kā pardā nahīñ thā

hai 'amjad' aaj tak vo shaḳhs dil meñ

ki jo us vaqt bhī merā nahīñ thā

agarche koi bhi andha nahin tha

likha diwar ka paDhta nahin tha

kuchh aisi barf thi us ki nazar mein

guzarne ke liye rasta nahin tha

tumhi ne kaun si achchhai ki hai

chalo mana ki main achchha nahin tha

khuli aankhon se sari umr dekha

ek aisa KHwab jo apna nahin tha

main us ki anjuman mein tha akela

kisi ne bhi mujhe dekha nahin tha

sahar ke waqt kaise chhoD jata

tumhaari yaad thi sapna nahin tha

khaDi thi raat khiDki ke sirhane

dariche mein wo chand utra nahin tha

dilon mein girne wale ashk chunta

kahin ek jauhari aisa nahin tha

kuchh aisi dhup thi un ke saron par

KHuda jaise gharibon ka nahin tha

abhi harfon mein rang aate kahan se

abhi main ne use likkha nahin tha

thi puri shakl us ki yaad mujh ko

magar main ne use dekha nahin tha

barahna KHwab the suraj ke niche

kisi ummid ka parda nahin tha

hai 'amjad' aaj tak wo shaKHs dil mein

ki jo us waqt bhi mera nahin tha