agarche shola ayan nahin hai agarche lab par dhuan nahin hai

agarche sho'la ayaañ nahīñ hai agarche lab par dhuāñ nahīñ hai

nihāñ jise ham samajh rahe haiñ vo aag dil kī nihāñ nahīñ hai

ye raah vo hai ki har musāfir ke tajrabe jis meñ muḳhtalif haiñ

vo kaun insāñ hai zindagī jis kī ik na.ī dāstāñ nahīñ hai

kidhar ko jaa.eñ kise pukāreñ muḌeñ ki aage hī baḌhte jaa.eñ

ġhubār kā bhī tire sahārā hameñ to ai kārvāñ nahīñ hai

zarā ye sahrā ko jaane vāloñ se koī pūchhe kahāñ chale tum

kahīñ hai koī zamīn aisī jahāñ pe ye āsmāñ nahīñ hai

vo mehrbāñ ho to vasvasa ye ki mehrbānī ye daf.atan kyoñ

vo sargirāñ hai to hai ye hasrat ki haa.e vo mehrbāñ nahīñ hai

ye dil kī paiham sī be-qarārī nazar kī harkāt-e-iztirārī

aur us pe isrār-e-parda-dārī ki jaise vo rāz-dāñ nahīñ hai

vahī hikāyat dil-o-nazar kī vahī kahānī hai chashm-e-tar kī

'razā' ye merī ġhazal-sarā.ī na.ī koī dāstāñ nahīñ hai

agarche sho'la ayan nahin hai agarche lab par dhuan nahin hai

nihan jise hum samajh rahe hain wo aag dil ki nihan nahin hai

ye rah wo hai ki har musafir ke tajrabe jis mein muKHtalif hain

wo kaun insan hai zindagi jis ki ek nai dastan nahin hai

kidhar ko jaen kise pukaren muDen ki aage hi baDhte jaen

ghubar ka bhi tere sahaara hamein to ai karwan nahin hai

zara ye sahra ko jaane walon se koi puchhe kahan chale tum

kahin hai koi zamin aisi jahan pe ye aasman nahin hai

wo mehrban ho to waswasa ye ki mehrbani ye dafatan kyon

wo sargiran hai to hai ye hasrat ki hae wo mehrban nahin hai

ye dil ki paiham si be-qarari nazar ki harkat-e-iztirari

aur us pe israr-e-parda-dari ki jaise wo raaz-dan nahin hai

wahi hikayat dil-o-nazar ki wahi kahani hai chashm-e-tar ki

'raza' ye meri ghazal-sarai nai koi dastan nahin hai