ahd-e-junun mein baiThe baiThe jo ghazlen likh Dali thin

ahd-e-junūñ meñ baiThe baiThe jo ġhazleñ likh Daalī thiiñ

ham ko rusvā duniyā bhar ko pāgal karne vaalī thiiñ

āñkhoñ meñ vo shaam kā TukḌā aksar chubhtā rahtā hai

ghar meñ āñdhī jab aa.ī thī sham.eñ jalne vaalī thiiñ

chāñd sitāre TuuT rahe the ḳhvāboñ kī añgnā.ī meñ

aañkh khulī to dekhā ghar kī sab dīvāreñ kaalī thiiñ

chuTkī bhar ummīd nahīñ thī kaasa le kar kyā phirte

shahr-e-vafā kī saarī galiyāñ apnī dekhī-bhālī thiiñ

pyaar kā mausam biit chukā thā bastī meñ jab pahuñche ham

logoñ ne phūloñ ke badle talvāreñ mañgvā lī thiiñ

'qaisar' dil kā haal sunā kar jab yāroñ kā muñh dekhā

sab ke chehre sūkhe sūkhe sab kī āñkheñ ḳhālī thiiñ

ahd-e-junun mein baiThe baiThe jo ghazlen likh Dali thin

hum ko ruswa duniya bhar ko pagal karne wali thin

aankhon mein wo sham ka TukDa aksar chubhta rahta hai

ghar mein aandhi jab aai thi shamen jalne wali thin

chand sitare TuT rahe the KHwabon ki angnai mein

aankh khuli to dekha ghar ki sab diwaren kali thin

chuTki bhar ummid nahin thi kasa le kar kya phirte

shahr-e-wafa ki sari galiyan apni dekhi-bhaali thin

pyar ka mausam bit chuka tha basti mein jab pahunche hum

logon ne phulon ke badle talwaren mangwa li thin

'qaisar' dil ka haal suna kar jab yaron ka munh dekha

sab ke chehre sukhe sukhe sab ki aankhen KHali thin