ai dil achchha nahin masruf-e-fughan ho jaana

ai dil achchhā nahīñ masrūf-e-fuġhāñ ho jaanā

ġham kī tauhīn hai ashkoñ kā ravāñ ho jaanā

dil kī āvāz bhī majrūh jahāñ hotī hai

aise hālāt meñ ḳhāmosh vahāñ ho jaanā

mere aañsū jo gireñ Taañk lo tum juuḌe meñ

dekh le koī to phūloñ kā gumāñ ho jaanā

ahl-e-sāhil ko bhī andāza-e-tūfāñ ho jaa.e

qatra-e-ashk zarā sail-e-ravāñ ho jaanā

ruḳhsat-e-mausam-e-gul ke bhī uThāo sadme

itnā āsāñ nahīñ ehsās-e-ḳhizāñ ho jaanā

qaid-e-mausam nahīñ naġhmāt-e-anā dil ke liye

koī mausam ho gul-e-tar kī zabāñ ho jaanā

mere jiine kā sahārā thiiñ jo nazreñ kal tak

kyā sitam hai unheñ nazroñ kā garāñ ho jaanā

shauq-afzā hai ye andāz-e-hijāb-e-ḳhūbāñ

dil meñ rahte hue āñkhoñ se nihāñ ho jaanā

vo gulistāñ meñ jo aa jaa.eñ to mumkin hai 'ḳhayāl'

muskurātī huī kaliyoñ kā javāñ ho jaanā

ai dil achchha nahin masruf-e-fughan ho jaana

gham ki tauhin hai ashkon ka rawan ho jaana

dil ki aawaz bhi majruh jahan hoti hai

aise haalat mein KHamosh wahan ho jaana

mere aansu jo giren Tank lo tum juDe mein

dekh le koi to phulon ka guman ho jaana

ahl-e-sahil ko bhi andaza-e-tufan ho jae

qatra-e-ashk zara sail-e-rawan ho jaana

ruKHsat-e-mausam-e-gul ke bhi uThao sadme

itna aasan nahin ehsas-e-KHizan ho jaana

qaid-e-mausam nahin naghmat-e-ana dil ke liye

koi mausam ho gul-e-tar ki zaban ho jaana

mere jine ka sahaara thin jo nazren kal tak

kya sitam hai unhen nazron ka garan ho jaana

shauq-afza hai ye andaz-e-hijab-e-KHuban

dil mein rahte hue aankhon se nihan ho jaana

wo gulistan mein jo aa jaen to mumkin hai 'KHayal'

muskuraati hui kaliyon ka jawan ho jaana