ai dil-e-zar kahin nind na ho tari

ai dil-e-zār kahīñ niiñd na ho taarī

chashm-e-darvesh bhī ḳhvāboñ se nahīñ aarī

jism kā dasht bhī sunsān hai barsoñ se

mulk-e-dil par bhī nahīñ ruuh kī sardārī

chāñd se kam na thī ham hijr ke māroñ ko

us shab-e-tār meñ mauhūm sī chingārī

yak-ba-yak kaun mirī fikr meñ dar aayā

nahr-e-ḳhushbū sī bayābāñ meñ huī jaarī

raakh ke Dher meñ sho'la hai koī raqsāñ

mere andar hai abhī tak koī inkārī

zulf-e-pechāñ tirī zanjīr banegī kab

kab 'amal meñ mirī aa.egī giraftārī

ai dil-e-zar kahin nind na ho tari

chashm-e-darwesh bhi KHwabon se nahin aari

jism ka dasht bhi sunsan hai barson se

mulk-e-dil par bhi nahin ruh ki sardari

chand se kam na thi hum hijr ke maron ko

us shab-e-tar mein mauhum si chingari

yak-ba-yak kaun meri fikr mein dar aaya

nahr-e-KHushbu si bayaban mein hui jari

rakh ke Dher mein sho'la hai koi raqsan

mere andar hai abhi tak koi inkari

zulf-e-pechan teri zanjir banegi kab

kab 'amal mein meri aaegi giraftari