اے دوست جدائی کا اب کوئی مداوا دے

اے دوست جدائی کا اب کوئی مداوا دے

یا آتش ہجراں کو کچھ اور بھی بھڑکا دے

اے بحر سخا آخر کب تک یہ غلط بخشی

صحرا کو ملے قطرہ اور ذرے کو دریا دے

وہ غنچہ دہن بولے کچھ منہ سے کہ مت بولے

اے باد صبا میرا پیغام تو پہنچا دے

انگور کا رس پی کر تسکین نہیں ہوتی

تپتے ہوئے ہونٹوں سے تپتی ہوئی صہبا دے

آغاز محبت کیا تمہید خرابی ہے

اے ترک جفا پیشہ ہاں کچھ تو اشارا دے

ناکام تمنا سے تو کام کی باتیں کر

اے حسن بہانہ جو مت کل کا بھلاوا دے

ہم عشق کے ماروں کے انداز نرالے ہیں

دیکھو تو بہت الجھے سمجھو تو بہت سادے

اس وعدۂ فردا کا کیا خاک یقیں آئے

ہر صبح شب غم کو جو اور بڑھاوا دے

نقویؔ جسے خود اپنی نظروں پہ نہ ہو قابو

گستاخ نگاہی کی وہ تجھ کو سزا کیا دے