ai dost tera qurb to hum pa na sakenge

ai dost tirā qurb to ham pā na sakeñge

kyā naam bhī hoñToñ pe tirā lā na sakeñge

gahrā.ī se dil kī ubhar ā.eñge na.e giit

gaa.e hue gītoñ ko to ham gā na sakeñge

kahtī hai ye hālāt kī bigḌī huī sūrat

hālāt to ma.amūl pe ab aa na sakeñge

har daur meñ Takrā.e haiñ ham ahl-e-sitam se

ye to nahīñ ab zulm se Takrā na sakeñge

ik din hamīñ badleñge nizām-e-chamanistāñ

ye kis ne kahā daur nayā lā na sakeñge

jo ahl-e-farāsat haiñ vo haiñ ahl-e-farāsat

chāloñ meñ siyāsat kī kabhī aa na sakeñge

taqdīs-e-fan-e-sher kī saugand hai 'maġhmūm'

vo phuul khilā.uñgā jo kumhlā na sakeñge

ai dost tera qurb to hum pa na sakenge

kya nam bhi honTon pe tera la na sakenge

gahrai se dil ki ubhar aaenge nae git

gae hue giton ko to hum ga na sakenge

kahti hai ye haalat ki bigDi hui surat

haalat to mamul pe ab aa na sakenge

har daur mein Takrae hain hum ahl-e-sitam se

ye to nahin ab zulm se Takra na sakenge

ek din hamin badlenge nizam-e-chamanistan

ye kis ne kaha daur naya la na sakenge

jo ahl-e-farasat hain wo hain ahl-e-farasat

chaalon mein siyasat ki kabhi aa na sakenge

taqdis-e-fan-e-sher ki saugand hai 'maghmum'

wo phul khilaunga jo kumhla na sakenge