اے دوست ترا قرب تو ہم پا نہ سکیں گے

اے دوست ترا قرب تو ہم پا نہ سکیں گے

کیا نام بھی ہونٹوں پہ ترا لا نہ سکیں گے

گہرائی سے دل کی ابھر آئیں گے نئے گیت

گائے ہوئے گیتوں کو تو ہم گا نہ سکیں گے

کہتی ہے یہ حالات کی بگڑی ہوئی صورت

حالات تو معمول پہ اب آ نہ سکیں گے

ہر دور میں ٹکرائے ہیں ہم اہل ستم سے

یہ تو نہیں اب ظلم سے ٹکرا نہ سکیں گے

اک دن ہمیں بدلیں گے نظام چمنستاں

یہ کس نے کہا دور نیا لا نہ سکیں گے

جو اہل فراست ہیں وہ ہیں اہل فراست

چالوں میں سیاست کی کبھی آ نہ سکیں گے

تقدیس فن شعر کی سوگند ہے مغمومؔ

وہ پھول کھلاؤں گا جو کمھلا نہ سکیں گے