ai junun hote hain sahra par utare shahr se

ai junūñ hote haiñ sahrā par utāre shahr se

fasl-e-gul aa.ī ki dīvāne sidhāre shahr se

ḳhuub ro.e haal par apne vatan kā sun ke haal

koī ġhurbat meñ jo aa niklā hamāre shahr se

jaan dūñgā maiñ asiir ai dosto chupke raho

zikr kyā us kā ki dīvāna sudhāre shahr se

mausam-e-gul meñ rahā zindāñ meñ aur aa.ī na maut

sāmne hotī nahīñ hai aañkh saare shahr se

josh-e-vahshat meñ jo lī zindāñ se maiñ ne rāh-e-dasht

kaudkāñ mujh ko ḳhudā-hāfiz pukāre shahr se

paañv meñ majnūñ ke to tāqat nahīñ ai kūdko

mausam-e-gul kī huā tum ko ubhāre shahr se

ik nazar lillāh ham ko sūrat-e-zebā dikhāo

tishna-e-dīdār jaate haiñ tumhāre shahr se

dasht-gardī kī nahīñ dīvāne ko kuchh ehtiyāj

jaama se bāhar jo hai bāhar hai saare shahr se

choT sī lagtī hai dil jangal se hotā hai uchāT

sañg-e-tiflāñ karte haiñ mujh ko ishāre shahr se

josh-e-vahshat se nahīñ pahuñchā maiñ sahrā tak hanūz

jaane vaale gor ke pahuñche kināre shahr se

mausam-e-gul aa.ī niyyat ser dīvānoñ kī ho

meva-e-sahrā.ī par haiñ muñh pasāre shahr se

ab to āzurda hai tū lekin malegā haath phir

jis ghaḌī 'ātish' nikal jāvegā pyāre shahr se

ai junun hote hain sahra par utare shahr se

fasl-e-gul aai ki diwane sidhaare shahr se

KHub roe haal par apne watan ka sun ke haal

koi ghurbat mein jo aa nikla hamare shahr se

jaan dunga main asir ai dosto chupke raho

zikr kya us ka ki diwana sudhaare shahr se

mausam-e-gul mein raha zindan mein aur aai na maut

samne hoti nahin hai aankh sare shahr se

josh-e-wahshat mein jo li zindan se main ne rah-e-dasht

kaudkan mujh ko KHuda-hafiz pukare shahr se

panw mein majnun ke to taqat nahin ai kudko

mausam-e-gul ki hua tum ko ubhaare shahr se

ek nazar lillah hum ko surat-e-zeba dikhao

tishna-e-didar jate hain tumhaare shahr se

dasht-gardi ki nahin diwane ko kuchh ehtiyaj

jama se bahar jo hai bahar hai sare shahr se

choT si lagti hai dil jangal se hota hai uchaT

sang-e-tiflan karte hain mujh ko ishaare shahr se

josh-e-wahshat se nahin pahuncha main sahra tak hanuz

jaane wale gor ke pahunche kinare shahr se

mausam-e-gul aai niyyat ser diwanon ki ho

mewa-e-sahrai par hain munh pasare shahr se

ab to aazurda hai tu lekin malega hath phir

jis ghaDi 'atish' nikal jawega pyare shahr se