ai mere ham-kinar jism chal mujhe be-kanar kar

ai mire ham-kinār jism chal mujhe be-kanār kar

maiñ tujhe mushtahar karūñ tū mirā ishtihār kar

donoñ ko yaad to rahe baiThe haiñ ār-pār ham

biich ke is charāġh ko dekh to leñ pukār kar

paanī yahāñ se chal diyā tujh ko pukārte hue

baiThā ab apne hauz par paanī kā intizār kar

jism se ġham nikal gayā kapḌoñ kā dam nikal gayā

aur mujhe rihā.ī de aur mirā shikār kar

hijr ke haath khil ke dekh vasl ke saath mil ke dekh

ek se iḳhtiyār maañg ek ko iḳhtiyār kar

raat bachī na din bache vaqt bahut sā bach gayā

vā'de kī raat kaaT kar vā'de kā din guzār kar

shahr meñ dāḳhle kī shart jism nahīñ thā ruuh thī

jism kā jism rakh diyā sar se kahīñ utaar kar

ḳhaak bhī jam ga.ī mirī raakh bhī tham ga.ī mirī

lauTūñgā aaj der se thoḌā sā intizār kar

ai mere ham-kinar jism chal mujhe be-kanar kar

main tujhe mushtahar karun tu mera ishtihaar kar

donon ko yaad to rahe baiThe hain aar-par hum

bich ke is charagh ko dekh to len pukar kar

pani yahan se chal diya tujh ko pukarte hue

baiTha ab apne hauz par pani ka intizar kar

jism se gham nikal gaya kapDon ka dam nikal gaya

aur mujhe rihai de aur mera shikar kar

hijr ke hath khil ke dekh wasl ke sath mil ke dekh

ek se iKHtiyar mang ek ko iKHtiyar kar

raat bachi na din bache waqt bahut sa bach gaya

wa'de ki raat kaT kar wa'de ka din guzar kar

shahr mein daKHle ki shart jism nahin tha ruh thi

jism ka jism rakh diya sar se kahin utar kar

KHak bhi jam gai meri rakh bhi tham gai meri

lauTunga aaj der se thoDa sa intizar kar